Nthabeleng Seitlheko Sepolesa sa Lesotho se tekenetse tumellano ea ts’ebetso le LNIG Hollard le ho fana ka thepa ho lefapha la litima-mollo, e reretsoeng ho tlatsetsa mesebetsing ea sepolesa toants’ong ea mollo. Tsena li bile ka la 31 Phato monongoaha.
Mookameli oa LNIG Hollard, Mpho Vumbukani, o itse o thabile hore ebe ba etsa mosebetsi o thusang Sepolesa sa Lesotho hore se tle se fane ka lits’ebeletso. A re mosebetsi oa bona ke ho fana ka ts’ireletso ho baji ba lits’ebeletso lefapheng la mollo, hore ba atlehe ho etsa mosebetsi oo ka makhethe, kaha lets’oele le beta poho.
A re ke ha feela sepolesa se e-na le thepa se ka atlehang hore ba fumanele sechaba thuso, hobane ba thusa bahoebi kantle le kahare ho naha esitana le malapa. A re ho se ho e-na le bothata ba matlo a chang lefats’eng, ‘me thepa ena e tl’o ba thusa ho loants’a bothata boo.
A re ba boetse ba ananela botsebi ba sepolesa ka ho tataisa sechaba hore na se ka ipaballa joang kahare ho mesebetsi, ka hona ba tla be ba fokolitse mathata a ho iphumana ba lokela ho tima mollo.
Motlatsi oa Mookameli oa Sepolesa sa Lesotho, Paseka Mokete, o itse ba motlotlo ‘me ba leboha boikitlaetso ba LNIG Hollard, hobane taba ena e romella molaetsa oa hore Basotho ba ntse ba le teng ho thusana moo mathata a leng teng. A re ba ikotla sefuba ka bosebeletsi ba LNIG Hollard, kaha sepolesa se kolla ntsi hanong ‘me ke ka bahoebi feela se ka fumanang ts’ehetso.
A re leha ba na le boitlamo ba sitoa ho thusa batho kaha ba hloka lisebelisoa, empa ba tla e sebeletsa ho thibela, ‘me ba hlokomele, ho e sebelisa hantle mesebetsing eo e e reretsoeng molemong oa sechaba. Ke chelete e kaholimo ho M295,000.00 e sebelisitsoeng ho lokisa likoloi le ho reka thepa.
Superintendent ‘Muso Lehlokoa ea lisitseng lefapha la mollo sepoleseng, o itse thepa eo ba e filoeng e thusa ho sireletsa bophelo ba batho le phefumoloho, ‘me thepa ena e tla sebelisoa moo ho nang le khaello ea moea, e le hore bona ba bolokehe ba tsebe ho pholosa batho ba bang, hape e tla ba thusa ka lipuisano tse bulehileng nakong eo ba pholosang moaho.
