Nthabeleng Seitlheko E le katoloso ea phano ea lits’ebeletso kahara sechaba, morafo oa litaemane Lets’eng Diamond Mines, e nehelane ka koloi ho Sepolesa sa Lesotho, ka la 25 Phato monongoaha.
Motlatsi oa Mookameli oa Sepolesa sa Lesotho DCP Mahlape Morai, o itse koloi ena e fanoe lefapheng le sebetsanang le litaemane le lithetefatsi, ‘me mosebetsi o moholo ke hore ba tlisitse phetoho ts’ebetsong ea bona, ‘me ba khethile ho fana sebakeng sa polokeho ea ts’ebetso ea sepolesa le Basotho.
Lebitsong la Mookameli oa Lets’eng Diamonds Ts’epo Hlojeng, o re ba tiisitse boitlamo ba bona ba ho khutlisetsa sechabeng nako eohle ha ba ntse ba sebetsa kahar’a naha, ‘me ba ithutile tlala le bofuma bo tjametseng Basotho, ka hona ba hloka hore ba etse tlatsetso, ka ho ba ts’ehetsa tlhahisong ea lijo le ho tsetela litabeng tsa bophelo le tsa thuto kaha selemo le selemo ba fana ka lihlapiso ho bana ba Basotho.
A re ba rata hore moo litlolo tsa molao li etsahalang ba sebetse ‘moho, hoba liqholotso li ngata tsa ho nyamela kapa ho utsuoa ha litaemane, ‘me tlatsetso ea bona ke hore ba fane ka koloi e le tlatsetso mosebetsing oa sepolesa.
Letona la tsa Lehae, Sepolesa le Borena, Mohlomphehi Lebona Lephema, o itse Lets’eng Diamond Mine e kentse letsoho toants’ong ea litlolo tsa molao, kaha mapolesa a tla tseba ho fihlela sechabeng. A re o ile a potoloha le litsi tse ling tsa sepolesa e le mokhoa oa ho bona hore sepolesa se fumana lisebelisoa.
A re ba leboha lets’eng ka mpho ena kaha e kenya letsoho ntlafalong ea lits’ebeletso tsa sepolesa, ‘me ba koetlisitse mapolesa a tla sebelisa likoloi tsa sepolesa hore li laolehe ka nepo. O re o rata hore Basotho ba ts’oarane ka matsoho le bahoebi ba thuse Sepolesa sa Lesotho kaha se le teng ho thusa Basotho.
A re boemo ba motebo oa sepolesa Ha Ramabanta ha o na chebahalo e ntle, kaha ba alosa metse e kaholimo ho 100, ‘me ho sebetsa Mapolesa a 16, bana le pere e le ‘ngoe. A re Thabana-Morena litlaleho tsa litlolo tsa molao li theohile, ‘me ba alosa metse e 133 empa ba se na le koloi, marako a’ ritsa a kanna a oela. A re o kholisehile hore mapolesa a sebetsa ka thata ho sireletsa Basotho, ho boloka le ho sireletsa seriti sa naha. A re ba batla ho etsa bonnete ba hore mapolesa a na le seaparo se setle.
