Mathabang Fobo Tona-Kholo ea Lesotho Dr. Moeketsi Majoro o re ke ka masoabi a maholo a elang hloko ka tahlehelo ea bophelo ba Tona-Kholo ea mehleng ea naha ea Japane, Shinzo Abe (68), ea felletsoeng ke bophelo kamor’a ho thunyetsoa lefu a le sebokeng sa lipolotiki sa boiketelo ba likhetho Southern City, Nara, ka Labohlano la la 8 Phupu monongoaha. Dr. Majoro o fetiselitse matšeliso ho naha ea Japane, lelapa la Abe le sechaba sa naha eo, ‘me molaetseng oa hae o hlalositse hore ruri Lesotho le Basotho ba lla mosoang le naha ea Japane, ‘me ba re moea oa hae o phomole ka khotso.
Abe ke mopolotiki oa naha ea Japane ea sebellelitseng naha eo e le Tona-Kholo ebile e le Presidente eamokha oa lipolotiki oa Liberal Democratic Party (LDP), hape ebile Tona-Kholo e bileng litulong nako e telele ho feta ba bang, ho tloha ka selemo sa 2006 ho isa 2007 a boela hape ka selemo sa 2012 ho ea 2020. Ho sa le joalo, ho ea ka litaba tsa la 9 Phupu monongoaha ho hlaha litabeng tsa ‘BBC NEWS’, sepolesa sa Japane se tšoere ‘melaelloa polaong ena, eo a bileng a lumela hore o entse ketso eo ka sethunya sa maiketsetso le sepolesa se netefalitse hore ho bile le liphoso tšireletsong ea Abe, ke moo eo rasethunya a ileng a atleha ho mo thunya le ho mo bolaea.
Ho feta moo ho ile hoa ba le boikhutso ba metsotsoana ho hlompha Abe, ‘me bona bo ne bo tšoaretsoe Ntlo-Kholo ea mokha ona Tokyo, nakong eo litho li ntseng li lebelletse sephetho sa likhetho. Sechaba sa Majapane se bonahetse ka bongata marang-rang se fetisa melaetsa e supang hore ba batla toka e seng lipolaeano. Abe o tlalehoa nakong ea boetapele ba hae har’a tse ling a ile a sebetsa ka matla ho bona hore ho ba le leano la moruo leo majapane a bileng a le bitsa “ Abenomics”, le thehiloeng holim’a phokotso ea lichelete, tšusumetso ea lichelete le tlhopho-bocha ea meralo.
Naha ea Japane ke e ‘ngoe e thusang naha ea Lesotho ka lintho tse ‘maloa, jaoloka ho aha likolo le litaba tsa lijo le phepo e nepahetseng, moo ngoahola naha eo e faneng ka chelete e $1.8Millione ho naha ea Lesotho ka Lenaneho la Lefaatše la Lijo (WFP), bakeng sa ho fepa bana ba likolo tsa likonyana tlasa leano la ‘muso la phepo likolong.
